mardi 30 octobre 2012

يعني ايه Freelancer ؟


أنا "Freelancer".. بتسمعها كتير؟ طيب يعنى ايه؟ 
يعني "اعمال حرة او مستقلة".. يعنى أنا اللى بحدد هشتغل أمتى وهشتغل فين.. أنا مدير نفسى وصاحب القرار، وده مش مرتبط بتخصص او مجال معين.

لاحظ إن النجاح في الأعمال الحرة محتاج إنك تركز وتتخصص في مجال معين لان أغلب اللي بيشتغلوا أعمال حرة بيكون عندهم أكتر من مهارة.

على سبيل المثال الـWeb developer ممكن يكون شاطر في الـprogramming وممكن يكون كمان اشتغل في تصميم الجرافيك من ناحية وعنده هواية الكتابة من ناحية تانية .. لو اشتغلت في كل اللى بتعرف تعمله مرة واحدة هتشتغل أكتر وطبعا كل ما الشغل زاد معناه دخل أكبر.

الطريقة دي بتنفع مع بعض اللى بيشتغلوا أعمال حرة لكن مش بتنفع للكل لان بعد شوية وقت المعاناة بتبدأ عشان في النهاية هتوصل لمرحلة تشتت ذهني وإنعدام تركيز في كل المجالات اللى بتتقنها، ونسبة كبيرة من الأعمال اللي نجحت في الأول وبعدين فشلت كان سببها الإفراط والتوسع في مجالات كتير.

لكن ده مش معناه إننا بنقولك حدد طموحك وإتخصص في مجال واحد بس وانت تقدر تشتغل في أكتر من مجال، بالعكس ممكن تمسك العصاية من النص وتعمل اللى بتحبه وفي نفس الوقت تتفادى الفشل..إزاي؟ 

قارن بين كل المجالات اللى بتحبها وحدد مجهودك الأساسي المفروض يتركز في أي مجال أكتر من التاني، المؤشر اللى ممكن يحدد لك تختار أي مجال فيهم هو أي واحد فيهم بيعمل فلوس أكتر من التاني وبالتالي هيكون عندك سبب منطقي يخليك تكمل في مجال ما أكتر من غيره، ولو أكتر من مجال بيدخلوا دخل كويس فمش منطقي أبدا انك تسيب أي مجال منهم في سبيل التركيز في مجال واحد وعدم التشتيتت، ممكن في الحالة دي تشغل معاك ناس تانية شاطرة في المجالات دي وبكده تبقى وسعت شغلك وفي نفس الوقت ركزت مجهودك لمجال واحد رئيسي وماضيعتش فرصة الدخل اللى جايلك من طرق تانية.


وهنا لازم تعرف أنه من أكبر المشاكل اللى بتواجه الـ freelancers هى ضياع وعدم تنظيم الوقت، خصوصا لو شغلك بيكون على الكمبيوتر والنت.. طيب والحل؟!

علشان تخرج برة الدايرة دى لازم تلزم نفسك بجدول زمنى محدد كل يوم، وفى وقت الشغل تقفل كل اللى ممكن يشغلك، ولو شغلك مش محتاج نت تقدر تفصله.

وفى حالة التزامك بالجدول تكافىء نفسك بوقت راحة محدد تعمل فيه شىء بتحبه، وبكده فى كل مرة هتستسلم فيها وتخرج عن الجدول هتلاقى نفسك بتتعاقب تلقائيا بحرمانك من الراحة والمكافأة اليومية.. ومع الوقت التزامك بالجدول الزمنى يتحول لعادة.

وفيه مشكلة تانية ممكن تواجهك هي: انه بعد تسليم الشغل المطلوب منك أفتكرت ان فى أجزاء نسيت تحطها..أو نسيت تشتغل عليها؟ وترجع تشتغل على المشروع من تانى..ويضيع منك وقت ومجهود ، طيب والحل؟؟

فكرة بسيطة وسهلة لاصحاب الاعمال الحرة: قبل ما تبدأ تشتغل أكتب خطة للمشروع اللى هتشتغل عليه فيها كل المطلوب منك، وضيف عليهم أفكارك وقسم الخطة فى شكل خطوات.

أنقل الخطوات فى Check List وأتأكد انك كتبت كل حاجة، وبمجرد ما تخلص شغلك راجع الخطوات وعلم على الخطوات اللى نفذتها، وببساطة هتتأكد انك نفذت كل المطلوب ولا فى أجزاء لسه محتاجة شغل.. وبالطريقة دى تتأكد انك مش هتنسى حاجة وشغلك مش هيحتاج أى تعديل.

هذا الموضوع وما سيليه عن ريادة الأعمال نقلا عن صفحة IMIDOS على الفيس بوك.. هنا

Aucun commentaire:

Enregistrer un commentaire